ამ ბლოკში მოცემული ყველა აქტივობა აქცენტირებულია, ვინაიდან პროგრამებისთვის ხელსაყრელი გარემო პირობების უზრუნველყოფას კრიტიკული მნიშვნელობა აქვს ძდჯ-თვის.

1.1.1.1-1.1.1.3 ღონისძებები გპგ-ს სამუშაო (2017 წლის იანვრის რედაქცია დამტკიცებული ქ.ს.ს.-ს მიერ) ვერსიაში ითვალისწინებდა ნარკოტიკის მოხმარებისთვის სისხლის სამართლებრივი პასუხისმგებლობის გაუქმებას, კერძოდ, საქართველოს სისხლის სამართლის კოდექსის 273-ე მუხლის გაუქმებას. საბოლოო რედაქცით კი კანონმდებლობის გადახედვა და ოთხ-სვეტიანი ნარკოპოლიტიკის გატარებაა მოცემული. ოთხ-სვეტიანი ნარკოპოლიტიკის განხორციელება ანტინარკოტიკული უწყებათაშორისი საბჭოს მიერ შემუშავებული სტრატეგიისა და სამოქმედო გეგმის მეშვეობით უნდა დარეგულირდეს. ცნობისათვის, 2014-2015 წლებში მოქმედებდა და ახლაც უნდა მოქმედებდეს მსგავსი ნარკოპოლიტიკა, თუმცა კანონმდებლობაზე და პრაქტიკაზე დაკვირვებით შეიძლება ითქვას, რომ შეუძლებელი იქნება ამგვარი დაბალანსებული პოლიტიკის გატარება, სანამ დიამეტრალურად არ შეიცვლება მიდგომა რეპრესიულიდან საზოგადოებრივ ჯანმრთელობაზე ორიენტირებულით.

გპგ-ს მიღების ბოლო ეტაპზე ინდიკატორების ასეთი ცვლილება აჩვენებს, რომ საქართველო ამ ეტაპზე მზად არ არის რეპრესიული ნარკოპოლიტიკის ბერკეტის ხელიდან გასაშვებად.

ამავე ბლოკში ინდიკატორადაა მოყვანილი ჯანმრთელობის დაცვის და სოციალურ საკითხთა საპარლამენტო კომიტეტისა და ნარკოპოლიტიკის ეროვნული პლატფორმის მონაწილეობით საკანონმდებლო ცვლილებების პაკეტზე მუშაობის პროცესი. ამ ეტაპზე, კანონპროექტის განხილვა არ დაწყებულა და არ არსებობს გარანტია, რომ ამ პროცესის შედეგად, სადამსჯელო ნარკოპოლიტიკის ცვლილება მოხდება.

შესყიდვებთან მიმართებაში აღსანიშნავია, რომ სახელმწიფო ორგანიზაციებისათვის არ არსებობს სამოქალაქო საზოგადოების დაკონტრაქტების სამართლებრივი ბარიერები (აქტივობა 1.1.2.1.). თუმცა ხისტი სატენდერო პროცედურები ზღუდავს ფინანსურად/ორგანიზაციულად სუსტი, ან მხოლოდ არასამეწარმეო საქმიანობის განამხორციელებელი ორგანიზაციების მონაწილეობას (მაგ. მათ უჭირთ ან ვერ ახერხებენ საბანკო გარანტიის წარმოდგენას, რომელიც მოითხოვება სატენდერო პირობებით).

პრობლემის საკანონმდებლო დონეზე მოგვარებისთვის, აუცილებელია სახელმწიფო შესყიდვების შესახებ კანონში სოციალურ კონტრაქტთან დაკავშირებული ცვლილებების ინიცირება, რაც ნაკლებ მოსალოდნელია. გპგ-ში პირდაპირ იკითხება, რომ იგეგმება არა სახელმწიფო შესყიდვების შესახებ კანონში ცვლილების შეტანა, არამედ სათემო სექტორის ბარიერების კვლევა და შემდგომში მათთან იმგვარად მუშაობა, მარტივად რომ ვთქვათ, საბანკო განარანტიის წარმოდგენა შესძლონ. ექსპერტებს ხშირად არგუმენტად მოჰყავთ სახელმწიფო შესყიდვების ამ კანონის პოზიტიური შეფასება საერთაშორისო ექსპერტების მიერ. თუმცა, თუ კი კანონი კარგია, არ ნიშნავს, რომ მისი გაუმჯობესება არ შეიძლება. სამოქალაქო საზოგადოებამ ერთობლივი ძალისხმევით უნდა შესძლოს საქართველოს მთავრობისთვის ცვლილებების აუცილებლობის მკაფიო დასაბუთება, რათა გაუმჯობესებულმა კანონმა ხელი შეუწყოს ორგანიზაციების საქმიანობის განხორციელებას და არა პირიქით, შეაფერხებს ის.

გამოწვევების დასაძლევად, საჭიროა სამოქალაქო საზოგადოების და სხვა დაინტერესებული მხარეების თანამონაწილეობით, არსებული რეგულაციების უფრო სიღრმისეული ანალიზი და იდენტიფიცირებულ ხარვეზებზე/ბარიერებზე დაყრდნობით, დეტალური ოპერაციული სახელმძღვანელოს შემუშავება, რომელშიც აღწერილი იქნება სამოქალაქო საზოგადოებრივ ორგანიზაციებთან ჯანმრთელობის სერვისების მიწოდებაზე ხელშეკრულებების დადების წესები და პროცედურები (აქტივობა 1.1.2.2.).

ასევე მნიშვნელოვანია სამოქალაქო საზოგადოების შესაძლებლოების გაძლიერება სახელმწიფო შესყიდვების მოთხოვნების დაკმაყოფილების პოტენციალის განვითარების მიზნით (აქტივობა 1.1.2.3.). საჭიროა ტრენინგების ორგანიზება, რათა მათ უფრო მოქნილად შეძლონ პროგრამების მართვა და საჭირო რესურსების მობილიზება სახელმწიფო შესყიდვებში მონაწილეობის პროცესში. ტრენინგის კურიკულუმის მომზადებასა და ტრენინგების ჩატარებაში აქტიურად უნდა იყვნენ ჩართული სამოქალაქო საზოგადოება. თუმცა, ეს უნდა ხდებოდეს სახელმწიფოს მხრიდან ამ ორგანიზაციების უნიკალური როლის აღიარების ფონზე, რაც თავის მცრივ, კანონში შესაბამისი ცვლილებების შეტანით იქნება შესაძლებელი.

სამოქალაქო და სათემო ორგანიზაციების აქტიური ჩართულობა სახელმწიფო ბიუჯეტის დაგეგმვისა და მონიტორინგის პროცესში ამ ჯგუფის ინტერესების დაცვისა და მომსახურების მდგრადობის უზრუნველყოფის ერთ-ერთი ყველაზე მდგრადი მექანიზმია.

ამ მიზნით, რეგულარულად უნდა განხორციელდეს როგორც საადვოკაციო საქმიანობა, ისე არსებული დაფინანსებისა და გპგ-ით და სხვა მასთან დაკავშირებული დოკუმენტებით (აივ-ის, C ჰეპატიტის, ტუბერკულოზის ეროვნული გეგმები) აღებული ვალდებულებების მონიტორინგი. რეგულარული მონიტორინგისა და კონტროლის მიზნით, საჭიროა შეიქმნას მექნიზმები, რომელიც უზრუნველყოფს სამოქალაქო საზოგადოების ჩართულობას ამ პროცესში. ყოველწლიურად CCM-ის და PAAC-ის სხდომებზე უნდა მოხდეს ანგარიშის წარდგენა სახელმწიფოს მიერ აივ/შიდსსა და ტუბერკულოზის მართვის სერვისებზე გაწეული ხარჯებისა და მიღებული შედეგების შესახებ (აქტივობა 2.1.1.2.). ასევე, ფართო საზოგადოებისთვის ხელმისაწვდომი უნდა გახდეს აივ/შიდსსა და ტუბერკულოზის დანახარჯების ეროვნული ანგარიშები (განთავსდეს ჯანდაცვის სამინისტროს ვებ-გვერდზე).

სამოქალაქო კონტროლის ეფექტურად განსახორციელებლად, სამოქალაქო და სათემო ორგანიზაციებმა უნდა შექმნან სახელმწიფო ფინანსური ვალდებულებების ერთიანი მატრიცა, რომელშიც ასახული იქნება როგორც გპგ-ით, ისე სხვა დაკავშირებული სტრატეგიებითა და სახელმწიფო პროგრამებით განსაზღვრული ფინანსური ვალდებულებები. ასეთი მიდგომით, შესაძლებელი იქნება დუბილირებულად აღებული ვალდებულებების (ანუ, ვალდებულება რომელიც რამოდენიმე გეგმაში არის გაწერილი) კონტროლის ეფექტური მექანიზმის შექმინისთვის, ისევე როგორც ჯამურად საჭირო სახელმწიფო ინვესტიციების ოდენობის განსაზღვრისთვისა და მონიტორინგისთვის.

აღსანიშნავია, რომ სახელმწიფოს მხრიდან გლობალური ფონდის დაფინანსების ჩანაცვლების პროცესი უკვე დაწყებულია. მაგრამ არსებობს მთელი რიგი მომსახურებები, რომლებიც დღესაც სრულად გლობალური ფონდის დაფინანსებაზეა დამოკიდებული. მნიშვნელოვანია ამ სერვისების მდგრადობის უზრუნველყოფა გლობალური ფონდის დაფინანსების დასრულების შემდეგ.

მნიშვნელოვანია სამოქალაქო საზოგადოების და ძირითადი დაზარალებული ჯგუფების მეტი ჩართულობა უშუალოდ საბიუჯეტო დაგეგმვის პროცესშიც. ეს გაზრდის სამოქალაქო კონტროლის საშუალებას.

შესამუშავებელია ქსს-ის და პასკ-ის ჩართულობის მექანიზმები აივ/შიდსის და ტუბერკულოზის ეროვნული პასუხის ბიუჯეტირების პროცესში.

აღსანიშავია, რომ ამ ღონისძიების ძირითად ტექსტში შეტანილი რედაქციის მიხედვით იგეგმება თანხების ალოკაცია, ხოლო სამოქმედო გეგმისა და მონიტორინგისა და შეფასების ჩარჩოს მიხედვით - ადვოკაცია.

გპგ-ის მიხედვით, აივ/შიდსის ახალ ნაციონალურ სტრატეგიულ გეგმას საფუძვლად დაფინანსების ტექნიკური და ალოკაციის ეფექტურობის კვლევა დაედება (აქტივობა 2.1.1.1.). შესაბამისად, მნიშვნელოვანია, რომ ამ პროცესში აქტიურად იყოს ჩართული და ინფორმირებული სამოქალაქო და სათემო ორგანიზაციები. საზოგადოების პროაქტიული როლი, ვინაიდან, სწორედ ამ კვლევის მიგნებები დაედება საფუძვლად შემუშავებას, სადაც განფასებული და დაბიუჯეტებული იქნება დაბალზღურბლოვანი სერვისებიც.

საქართველოს აივ/შიდსის ეროვნულ პასუხში ინვესტირების ოპტიმიზაციის კვლევა (OPTIMA) (აქტივობა 2.1.1.6.) ადასტურებს, რომ რესურსების გადანაწილება ეფექტური იქნება შემდეგ ჯგუფებზე: მამაკაცები, რომლებსაც სქესობრივი კავშირი აქვთ მამაკაცებთან და ქალებთან (MSMW), რადგან ამ ჯგუფში ყველაზე მაღალია აივ ინფექციის გავრცელება. აქვე აღსანიშნავია, რომ მიუხედავად ნიმ-ებში აივ პრევალენტობის დაბალი მაჩვენებლისა, ნიმ-ების პოპულაცია უნდა დარჩეს აივ/შიდსზე ეროვნული რეაგირების ერთ-ერთ პრიორიტეტულ ჯგუფად, რადგან აივ-ით დაზარალებული ყველაზე დიდი ჯგუფია და არსებობს აივ ინფექციის სწრაფი გავრცელების მნიშვნელოვანი საფრთხე.

დაფინანსების მდგრადობას გადამწყვეტი მნიშნველოვა აქვს არსებული შედეგების შენარჩუნებასა და გაუმჯობესებისთვის და რესურსების გადანაწილება მხოლოდ ეპიდემიოლოგიურ მონაცემებს არ უნდა ეყრდნობოდეს. მაგალითად, ზიანის შემცირების ღონისძიებების შემცირებას სხვა ქვეყნებში ამ ჯგუფში აივ-ის გავრცელების ზრდა მოჰყვა. ხოლო, მეორეს მხრივ, ამ მიდგომის სისწორეს ისიც მოწმობს, რომ ბოლო წლების განმავლობაში, მსმ-ის ჯგუფისთვის სერვისების არ იყო პრიორიტეტულად მიჩნეული აივ-ის დაბალი გარცელების გამო, და გამოყოფილი ფულადი სახსრებიც ცოტა იყო. შედეგად მივიღეთ 25.1%-იანი პრევალნტობა ამ ჯგუფში. მისასალმებელია მსმ ჯგუფის საჭიროებებზე დაგვიანებით, მაგრამ მაინც აქცენტირება, თუმცა სახელმწიფომ უნდა გააცნობიეროს, რომ ამის მიღწევას, რისკის სხვა ჯგუფისთვის განკუთვნილი სერვისების შემცირების ხარჯზე ვერ მიაღწევს.

გლობალური ფონდის პროგრამების დასრულების შემდეგ, მთავრობამ ასევე უნდა უზრუნველყოს აივ-თან დაკავშირებული კვლევების (აქტივობა 2.1.1.7.) დაფინანსება (მათ შორის ბიომარკერული და პოპულაციის ზომის განსაზღვრის კვლევები), რაც ხელს შეუწყობს მაღალი სარისკო ქცევის მქონე პოპულაციებში სარისკო ქცევის შესწავლასა და საჭიროებებზე მორგებულ დაფინანსებას. ფინანსური მდგრადობის უზრუნველყოფისთვის, ეს ღონისძიება უნდა აისახოს აივ/შიდსის 2019-2023 წლების ახალ სტრატეგიაში და განსაზღვროს დაფინანსების წყარო. აღსანიშნავია, რომ ეს კვლევები ძალიან მნიშვნელოვანია.

გპგ-ში საუბარია საბიუჯეტო რესურსების დივერსიფიკაციაზეც. დონორების დაფინანსების შემცირებისა და ეროვნული ვალუტის რყევების გამო, სავარაუდოდ, ჯანდაცვის სამინისტროზე დაკისრებული ფინანსური ტვირთი მნიშვნელოვნად გაიზრდება. ამიტომ, დამატებითი რესურსების მოზიდვა აუცილებელია სხვა სამთავრობო სააგენტოებისა (განათლებისა და მეცნიერების სამინისტრო, ახალგაზრდობისა და სპორტის სამინისტრო, თავდაცვის სამინისტრო, სასჯელაღსრულებისა და პრობაციის სამინისტრო და ა.შ.) და ადგილობრივი მთავრობების, ქალაქის მუნიციპალიტეტების ჩართვით. მნიშვნელოვანია კერძო სექტორის/დამსაქმებლების დაინტერესება აივ ეროვნული რეაგირების პროგრამით (აქტივობა 2.1.1.8.). აღსანიშნავია, რომ გპგ-ში ადგილობრივი ბიუჯეტებიდან რესურსების გამოყოფის ადვოკატირებაზე პასუხისმგებელ სუბიექტად სამოქალაქო საზოგადოება არის განსაზღვრული, თუმცა ამ პროცესში ცენტრალური ხელისუფლების ორგანოების ჩართულობას დიდი მნიშნვნელობა აქვს და სს/სო-მ უნდა შეეცადოს ასეთი თანამშრომლობის ინიცირებას.

ტუბერკულოზის ეროვნული პროგრამის დაფინანსებაში არსებული ღიობების შევსება (აქტივობა 2.1.2.1.) აგრეთვე მნიშვნელოვანი ღონისძიებაა, სამოქალაქო სექტორის მხრიდან მონიტორინგის განსახორციელებლად. მაგალითად, ამ ღონისძიების მონიტორინგისა და შეფასების ჩარჩოს მიხედვით 2015 წელს არსებული 46%-იანი სახელწიფო დაფინანსების წილი 2021 წელს 80%-მდე უნდა გაიზარდოს.

აივ/შიდსის ეროვნული რეაგირებისთვის ადამიანური რესურსების გადამზადებას, განსაკუთრებით არასამთავრობო ორგანიზაციებში დასაქმებული პირების, კრიტიკული მნიშნვნელობა აქვს. დღეს არსებული სერვისების მოდელი ითვალისწინებს რისკის შემცირების და ნკტ კონსულტანტების, თანასწორ-განმანათლებლების, საველე მუშაკების, სოციალური მუშაკების, მკურნალობის დამყოლობის კონსულტანტების ჩართულობას და ამ პოზიციებზე დასაქმებულ პირებს, ხშირ შემთხვევაში, არანაირი ფორმალური განათლება ამ მომსახურების მიწოდებაში მიღებული არ აქვს. გადამზადების, ისევე როგორც ამ პროფესიების ირგვლივ სახელმწიფო რეგულაციების შექმნაში მოაწილება აუცილებელია სს სო-ებისთვის. ამ პროცესში უზრუნველყოფილი უნდა იყოს, რომ თემის წარმომადგენლები კვლავ აქტიურად იქნებიან ჩართული მომსახურების მიწოდებაში.

მსგავსად აივ-ისა, ტუბერკულოზის სფეროშიც იგეგმება არასამედიცინო პერსონალის ფორმალური/პროფესიული ჩარჩოების შემუშავება და გადამზადების პროცესის დაწყება.

დღეს არსებული კანონმდებლობა ითვალისწინებს სამედიცინო პერსონალისა და სოციალური მუშაკის (დიპლომირებული) პროფესიულ ჩარჩოებს. შესაბამისად, ამ გპგ-ს დანერგვის პროცესში, მსგავსი სისტემა შეიქმნება, რამაც შეიძლება გადამწყვეტი გავლენა იქონიოს არსებული თანამშრომლების (ან ახალი პირების) სათემო მომსახურებების მიწოდების დასაქმების პერსპექტივებზე.

აივ-ის სფეროში ადამიანური რესურსების გადამზადების პოლიტიკის შემუშავებასა და დამტკიცებაზე 2018-2019 წლებში ჯამურად 32600 დოლარია გამოყოფილი (აქტივობა 2.2.1.1.) თუმცა ეს თანხა არა უშუალოდ კადრების (მათ შორის არასამთავრობო ორგანიზაციების პერსონალის) ტრენინგზეა გათვალისწინებული, არამედ კადრების უწყვეტი მომზადების პოლიტიკის შემუშავებაზე. მნიშვნელოვანი იქნება ამ პოლიტიკის შესაბამისად კადრების მომზადების დაბიუჯეტების პროცესის მონიტორინგი ეროვნული სტრატეგიული გეგმის შემუშავებისას.

ტუბერკულოზში ინტეგრირებული სერვისების მოდელების გენერალური გეგმის, ადამიანური რესურსის პოლიტიკის შემუშავებისა და ტუბერკულოზზე ტრენინგის ფორმალურ განათლებაში ინტეგრაციის (აქტივობები 2.2.2.1.1, 2.2.2.2.1, 2.2.2.2.5.) მნიშვნელოვანია წარიმართოს სამოქალაქო სექტორის ჩართულობით. ამჟამად ამ აქტივობებში ძირითადად უნივერსიტეტები და პროფესიული ასოციეციები მოიაზრებიან.

მმართველობის ბლოკს გადამწყვეტი მნიშვნელობა აქვს იმ დაფინანსების განსაზღვრაში, რომელითაც ქვეყანამ მთლიანად უნდა ჩაანაცვლოს გლობალური ფონდის და სხვა დონორების დაფინანსება. სწორედ აივ/შიდსის 2019-2023 წლების ეროვნული სტრატეგიისა და სამოქმედო გეგმის (აქტივობა 2.4.1.1.) შინაარსზე და ბიუჯეტზე იქნება დამოკიდებული მათ შორის დაბალზღურბლოვანი სერვისების მიწოდებაც (რომელიც ქვედა 2.6 ბლოკში განიხილება).

ექსპერტების აზრით, სასურველია, რომ ქსს-ს (აქტივობა 2.4.1.3. ) ფუნქციები შენარჩუნდეს გლობალური ფონდის პროგრამების დასრულების შემდეგაც. თუმცა ამის გარანტია გპგ-ში ცალსახად არ დევს და ნაკლებ მოლოდნელია, რომ სახელმწიფო ქსს არსებული სახით შეინარჩუნოს (სამოქალაქო სექტორის ფართო წარმომადგენლობით) და მას ჩააბაროს სახელმწიფო დაფინანსების, თუნდაც ზედამხედველობის, ფუნქცია.

მსგავსი დატვირთვა აქვს პაციენტთა თემის ან სხვა სამოქალაქო საზოგადოების ორგანიზაციების მონაწილეობას იგივე სახის ღონისძიებებში ტუბერკულოზის მიმართულებითაც (აქტივობები 2.4.2.1. და 2.4.2.3.).

მნიშვნელოვანია ამ ბლოკის ღონისძიებების (აქტივობები 2.5.1.1., 2.5.1.2. და 2.5.2.1) ინსტრუმენტალიზაცია სათემო და სამოქალაქო საზოგადოების ორგანიზაციების, აქტივისტების და პროგრამის ბენეფიციარების მხრიდან, რათა მოხდეს პროგრამის შედეგების ჯეროვანი გავრცელება ყველა დაინტერესებული მხარისათვის ხელმისაწვდომი გზით და ენით. სწორედ ამ სტრატეგიების შემუშავებას ემყარება ინფორმაციის გავრცელების მონიტორინგის ღონისძიებები (იხილეთ დეტალური ცხრილი), რომელიც ასევე სამოქალაქო სექტორის პრეროგატივაა.

ზიანის შემცირების ევრაზიის ქსელის ფინანსური მხარდაჭერით 2016 წელს შემუშავდა ეროვნული სტანდარტები ზიანის შემცირების მომსახურების გასაუმჯობესებლად. გაეროს მოსახლეობის ფონდის ტექნიკური მხარდაჭერით იქმნება სტანდარტული პაკეტები დეტალური აივ ინტერვენციებისათვის მსმ პოპულაციაში და ქვეყნის საკოორდინაციო საბჭოში. "ოპტიმა"-ს კვლევის რეკომენდაციების თანახმად, აივ პრევენციის სტანდარტების განვითარებისას მსმ პოპულაციაში გათვალისწინებულ უნდა იქნეს მიზნობრივი მომსახურება MSMW ჯგუფში (აქტივობა 2.6.1.1.).

მომსახურების სტანდარტი არის დოკუმენტი, რომლითაც განისაზღვრება მომსახურების მოცულობა, მომსახურების მიწოდებასთან დაკავშირებული მოთხოვნები (მაგალითად, თანამშრომლები და მათი კვალიფიკაცია) და მომსახურების ერთეულის ღირებულება.

ამ დოკუმენტის როგორც შემუშავებაში, ისე მის დანერგვასა და შემდგომ გადახედვაში მონაწილეობის მიღებას, გადამწყვეტი მნიშვნელობა აქვს თემისთვის, რადგან ამ დოკუმენტში არის განსაზღვრული კონკრეტულად რას და როგორ მიიღებს თითოეული ადამიანი, როდესაც ის მომსახურების მიმწოდებელს მიმართავს.

მნიშვენელოვანია, რომ სტანდარტები დამტკიცებული იყოს, რათა შეიქმნას მომსახურების მიწოდების ლეგალური საფუძველი და ასევე მნიშნვლოვანია, რომ მათი გადახედვა ხდებოდეს რეგულარულად.

აქტივობა 2.6.1.2. ითვალისწინებს 2018 და 2019 წლებში 25-25 ადამიანის ტრენინგს. აღსანიშნავია, რომ ეს ღონისძიება გამორჩენიალია გპგ განხორციელების გეგმაში, თუმცა თითოეულ წელს ტრენინგებზე 4600 დოლარია გამოყოფილი.

ამ ბლოკში მნიშვნელოვანი გარანტიებია ჩადებული. ორივე აქტივობა საბოლოო ჯამში უნდა ემსახურებოდეს აივ-სა და ტუბერკულოზზე ერონული რეაგირების მოქნილ და შეუფერხებელ ტრანზიციას. აღსანიშნავია, რომ ღონისძიებებში ხაზგასმულია, როგორც გეგმის სავალდებულო ხასიათი ისე, მისი სისტემური მონიტორინგის აუცილებლობა. მონიტორინგის ნაწილში, ამ გეგმის გარდა, სამოქალაქო და სათემო ორგანიზაციების მიერ გათვალისწინებული უნდა იყოს აივ-ისა და ტუბერკულოზის ეროვნული სტრატეგიული გეგმები და გლობალური ფონდის პროგრამის ფარგლებში დაგეგმილი ღონისძიებები.